Coach Annette Stemerding di Hulanda a duna atletanan di waterpolo U14 di Orca treinen pa sinku (5) siman largu. Riba djaluna i djaweps atardi for di 04 di yanüari pa 04 di febrüari coach Annette a trein i drill atletanan di Orca waterpolo di U14. Coach Vernon Toré i asistente Eran van Dijk tabata sigui i siña e ehesisionan for di coach Annette.
Coach Annette Stemerding ta “arts-microbioloog” (médiko-mikrobiólogo). Banda di su trabou coach Annette ta duna treinen di waterpolo na Hulanda. Coach Annette a hunga waterpolo pa añanan largu i ta duna treinen na hóbennan pa basta aña kaba. Coach Annette tin lisensia di KNZB pa duna treinen di waterpolo. Coach Annette a regala Orca waterpolo 30 bala di waterpolo, pa Orca por sigui desaroya e deporte di waterpolo aki na Kòrsou.
Coach Annette a indika ku e muchanan tin hopi potensial i loke ta importante ku nan tin hopi antusiasmo i hopi gana pa praktika e deporte di waterpolo.
Coach Annette a keda enkanta ku Kòrsou i lo ke bolbe bek un dia pa duna e deporte di waterpolo un man atrobe.
Direktiva di Orca ta gradisi Coach Annette i ta apresia kon bon ela trein e muchanan pa e tiki tempu ku e tabata na Kòrsou.
Coach Annette, masha masha danki na nòmber di e Atletanan di U14 di Orca, mayor di e atletanan, coachnan i Direktiva di Orca.
